HaTiM SuM

رمضان كريم وكل سنة وانتم طيبين وربنا يعدوه علينا جميعا واحنا بصحة وعافية

امبارح كان اول يوم شغل في رمضان و انا كعادي كل سنة بيبقى ليا طرائف من نوع خاص في اليوم ده والسنة دي بالذات الدنيا حر و انا قاعد في القاهرة لوحدي من غير عيلة (لانهم كلهم مسافرين السعودية عن والدي ) : ولا اصحاب (لان  كلهم واخدين اجازة اول اسبوع في رمضان )

الجميل السنة دي ان الطرائف بداءت معايا بدري اوي

الموقف الأول : صحيت من النوم على صوت رفيقي في الشقة بيصحيني بلهفة لاننا اتاخرنا على الشغل فقمت و جهزت نفسي باقصى سرعة ممكنة و قمت نازل راكب تاكسي ورايح الشغل ولما وصلت عند بوابة المنطقة الحرة لقيت منبه الموبايل بيرن و يا ريته ما رن صعقت ان الساعة لسه 8:20 صباحا :يعني تقريبا قبل الشغل بساعة  ،يصراحة افتكرت ان انا غلطان دورت على اقرب واحد اساله و الكل بيقولي اه فعلا الساعة 8:20   و اضطريت امشي جوا المنطقة الحرة علشضان اوصل الشركة ما الاقيش فيها غير افراد الأمن

الموقف الثاني: الساعة 3:30 وانا جعان وعطشان و كمان هلكان و لكني اصريت اني اكل اول يوم بنفسي مش هاروح اكل بره فدخلت عملت الشوربة و……  (حصل الموقف ) و هوا موقف طبيعي بيحصل لاي حد جديد على المطبخ زي حالاتي  (بس مش لازم يحصل قبل المغرب بساعة )  الانبوبة عملتها معايا ولفظت انفاسها الاخيرة معلنة عن استسلامها قبل الاذان بساعة كاملة  بس الحمد لله كنت خلصت اغلب الاكل وكويس ان الجو حر والاكل ما لحقش يبرد

كل رمضان وانتم بخير